Instituti KAF (IKAF) ka lansuar zyrtarisht formatin e ri mediatik IKAF Podcast, një platformë që synon të sjellë biseda të thelluara me profesionistë dhe figura kyçe nga fusha e financave, ekonomisë, menaxhimit dhe sektorit publik.
Episodi i parë i IKAF Podcast vjen me mysafir Lulzim Ismajli, ish-Drejtor i Thesarit në Ministrinë e Financave, ish-Zëvendësguvernator i Bankës Qendrore të Kosovës dhe aktualisht ligjërues në IKAF.
Gjatë bisedës, Ismajli ndan përvojën e tij profesionale në ndërtimin e institucioneve financiare në Kosovë, sfidat e menaxhimit publik, rolin e Bankës Qendrore në stabilitetin financiar, si dhe këndvështrime konkrete mbi funksionimin e sistemit monetar në situata të ndryshme ekonomike.
Podcast-i trajton tema si:
- financat publike dhe menaxhimi i parasë,
- stabiliteti financiar dhe roli i BQK-së,
- vendimmarrja në nivelet më të larta institucionale,
- zhvillimi profesional në sektorin financiar.
IKAF Podcast do të transmetohet rregullisht në rrjetet sociale të Institutit KAF dhe synon të shërbejë si burim informimi, edukimi dhe diskutimi për profesionistët, studentët dhe publikun e gjerë të interesuar për çështje ekonomike dhe financiare.
Me këtë format të ri, IKAF vazhdon misionin e tij për të kontribuar në rritjen e kulturës financiare dhe zhvillimin profesional në Kosovë.
