Në kuadër të Edukimit të Vazhdueshëm Profesional, me 15 shkurt 2025 u mbajt seminari i rëndësishëm “Tatimet Vjetore në Fokus: Si të deklaroni saktë dhe në kohë”. Ky seminar kishte për qëllim të pajisë pjesëmarrësit me njohuritë dhe aftësitë e nevojshme për deklarimin e saktë dhe në përputhje me legjislacionin tatimor të Kosovës. Seminari u ligjërua nga z.Sami Salihu.
Përmbajtja e Seminarit
Seminari trajtoi aspektet kryesore të legjislacionit tatimor dhe procedurat e deklarimit për individë, biznese të vogla dhe korporata të mëdha. Në kuadër të programit, pjesëmarrësit u njohën me:
- Deklarimin dhe pagesën e Tatimit në të Ardhura për:
- Bizneset e vogla individuale (IS);
- Bizneset e mëdha individuale (IL dhe PD);
- Korporatat e vogla (QS);
- Korporatat e mëdha (QL dhe CD);
- Ortakëritë (DO);
- Individët (DI).
Seminari përfshiu gjithashtu shembuj dhe ushtrime praktike për të ndihmuar pjesëmarrësit në përvetësimin e procedurave tatimore dhe zbatimin e tyre në praktikë.
Rezultatet që u fituan nga ky seminar:
Pjesëmarrësit e seminarit përfituan njohuri të detajuara mbi:
- Deklarimin e pasqyrave tremujore të tatimit dhe kontributeve për bizneset e vogla;
- Deklarimin e pagesave paradhënie për bizneset e mëdha;
- Deklarimin vjetor dhe pagesën e Tatimit mbi të Ardhurat Personale;
- Deklarimin dhe pagesën e Tatimit në të Ardhurat e Korporatave;
- Deklarimin e Tatimit për Ortakëritë dhe individët.
Ky seminar synoi të ndihmonte kontabilistët dhe profesionistët financiarë të përmirësojnë proceset e deklarimit tatimor dhe të sigurojnë përputhshmëri me rregulloret në fuqi.
Seminari ishte i dedikuar për kontabilistët e certifikuar dhe profesionistët e financave që merren me çështjet tatimore. Përveç përfitimeve praktike, pjesëmarrësit patën mundësinë të diskutojnë dhe ndajnë përvoja me ekspertët e fushës.
Ky seminar u zhvillua në kuadër të përkushtimit për edukim të vazhdueshëm dhe mbështetje profesionale për të gjithë ata që operojnë në fushën e kontabilitetit dhe financave në Kosovë.
Për më shumë informata mbi trajnimet dhe seminarët e ardhshëm, na ndiqni në webfaqen tonë dhe në rrjetet tona sociale.
