Administrata Tatimore e Kosovës (ATK) ka publikuar një seri materialesh të reja informuese për të ndihmuar tatimpaguesit në kuptimin dhe zbatimin e detyrimeve të tyre tatimore, me theks të veçantë në Furnizimet Elektronike dhe Transferimin e Çmimit. Këto materiale janë pjesë e përpjekjeve të ATK-së për të rritur transparencën dhe mbështetjen për tatimpaguesit, veçanërisht ata që operojnë në ekonomi digjitale ose në transaksione ndërkombëtare brenda grupeve të lidhura të bizneseve.
Çfarë përfshijnë materialet për Furnizimet Elektronike?
ATK ka sqaruar mënyrën e trajtimit tatimor për aktivitetet që zhvillohen në mënyrë elektronike, përfshirë:
- Aktivitetet ekonomike që mund të realizohen online;
- Blogimin si veprimtari ekonomike dhe trajtimi tatimor i të ardhurave nga kjo veprimtari;
- Përdorimi dhe të ardhurat nga kriptomonedhat;
- Ofrimi i shërbimeve digjitale nga kompani të huaja.
Të gjitha këto materiale mund t’i gjeni në rubrikën “Furnizimet Elektronike” në ueb-faqen e ATK-së: Kliko këtu
Material informues për Transferimin e Çmimit
Për bizneset që janë pjesë e grupeve të lidhura dhe angazhohen në transaksione ndërkombëtare, ATK ka publikuar një dokument pyetje-përgjigje për Transferimin e Çmimit, i cili ndihmon në kuptimin e kërkesave për dokumentim dhe përputhshmëri me rregullat tatimore.
Ky material është i qasshëm në rubrikën “Transferimi i Çmimit” në ueb-faqen e ATK-së: Kliko këtu
Pse ka rëndësi kjo?
Në një ekonomi gjithnjë e më digjitale dhe të globalizuar, ku shumë profesionistë veprojnë në distancë, përmes platformave online, ose ofrojnë shërbime ndërkombëtare, është thelbësore që të kuptohen obligimet tatimore për të shmangur gjobat dhe pasigurinë ligjore.
ATK fton të gjithë tatimpaguesit të informohen dhe, në rast të paqartësive, të kontaktojnë përmes kanaleve zyrtare të komunikimit:
info@atk-ks.org
https://www.atk-ks.org/pyetje-te-shpeshta/
