Administrata Tatimore e Kosovës (ATK) ka bërë të ditur se, duke filluar nga 21 korriku 2025, procesi i fiskalizimit të bllokave tatimorë do të bëhet vetëm në mënyrë elektronike, përmes Sistemit Elektronik EDI.
Ky ndryshim vjen si pjesë e zbatimit të Udhëzuesit Nr. 01/2025, i cili përcakton qartë procedurat dhe format për fiskalizimin e bllokave tatimorë në raste të veçanta, kur tatimpaguesit:
- Nuk janë të pajisur me Pajisje Elektronike Fiskale / Sisteme Fiskale (PEF/SF);
- Përballen me prishje ose ndërprerje të përkohshme të pajisjes fiskale;
- Ndodhen në periudhë kalimtare drejt instalimit të Softuerit Elektronik Fiskal (SEF).
Si funksionon fiskalizimi elektronik i bllokut tatimor?
Nga data 21.07.2025, tatimpaguesit duhet të:
- Kyçen në Sistemin EDI të ATK-së;
- Zgjedhin menynë “Fiskalizimi” dhe më pas “Fiskalizimi i bllokut tatimor” (menuja bëhet aktive nga data e sipërpërmendur);
- Plotësojnë formularin elektronik me të gjitha të dhënat e kërkuara;
- Gjenerojnë Kod Unik për Bllokun Tatimor, i cili vlen për maksimum 50 kuponë tatimorë.
Ky kod duhet të shënohet në çdo kupon dhe të jetë i lidhur me një transaksion konkret, ku jepet arsyeja për përdorimin e kuponit tatimor në vend të atij fiskal.
Shkarko Udhëzuesin zyrtar këtu:
? Udhëzuesi Nr. 01/2025 – PDF
Çfarë duhet të përmbajë kuponi tatimor?
Çdo kupon që fiskalizohet duhet të përmbajë:
- Të dhënat e tatimpaguesit;
- Të dhënat e transaksionit;
- Arsyen e përdorimit të kuponit tatimor në mungesë të kuponit nga PEF/SF/SEF.
Kujdes! Kuponët që nuk i përmbajnë këto elemente nuk do të konsiderohen të vlefshëm dhe ndaj tatimpaguesve mund të merren masa ndëshkuese sipas Ligjit Nr. 08/L-257 për Administrimin e Procedurave Tatimore.
Për kë është i rëndësishëm ky ndryshim?
Ky udhëzim është veçanërisht i rëndësishëm për:
- Bizneset e vogla që ende nuk kanë implementuar pajisjet fiskale;
- Tatimpaguesit që operojnë në zona ku prishjet teknike janë të shpeshta;
- Tatimpaguesit e rinj që janë në proces të fiskalizimit elektronik.
Nëse jeni pjesë e komunitetit të profesionistëve të kontabilitetit, financave apo tatimeve, në IKAF – sigurohuni që të jeni të informuar dhe të përgatitur për këtë ndryshim të rëndësishëm procedural.
Për më shumë informata ose asistencë teknike, ju rekomandojmë të kontaktoni direkt ATK-në ose të konsultoheni me profesionistët tuaj fiskalë.
